MAGGIE written by Robert D Mc Lean:

MAGGIE
Wha’s that yin in nummer ten,
That tak’s the joabs awa’ fae men,
Wha’s that yin fur Scotch folk disnae care,
Intends tae strip auld Scotland bare,
Wha’s that yin like an evil witch
Robs the pair tae gi’e tae the rich?
It’s Maggie!

Wha’s that yin the cooncils curse,
Fur stealin’ money oot their purse,
Wha’s that yin that’s no’ annoyed
Wi’ fower million unemployed
Wha’s that yin that mak’s ye boak
Fur things she does tae the pair auld folk?
It’s Maggie!

Wha’ that yin wi’ ice watter in her veins,
Wance stole the mulk fae the wee, skil weans,
Wha’s that yin that quotes St. Francis’s prayer,
An’ causes strife an’ trouble everywhere,
Wha’s that yin an’ her evil clan,
Intends tae destroy the workin, man?
It’s Maggie!

Wha’s that yin w’ plans uncouth,
That destroys the future o’ the youth,
Wha’s that yin that’s sae uncarin’
By Jove, some day, she’ll get her farm’,
Wha’s that yin an’ her pals ana’,
Forgets the wheels o’ God grind sma’
It’s Maggie!